A entrada en vigor da lei 30/2007, de 30 de outubro, de Contratos do Sector Público, supuxo un impulso á utilización dos medios electrónicos e informáticos na contratación pública. Nese marco legal, unha das liñas fundamentais de actuación dirixiuse a crear novos sistemas de información da actividade contractual, con figuras como os Perfís do contratante e as Plataformas de Contratación que, a través de Internet, convertéronse en ferramentas de gran axuda para o coñecemento e seguimento dos procedementos contractuais en curso e mesmo para que as PEMES coñeceran posibilidades de negocio no sector público e accederan facilmente ás licitacións.

A partir do 9 de marzo de 2018, coa entrada en vigor da nova Lei 9/2017, de 8 de novembro, de Contratos do Sector Público (en adiante LCSP), dáse un importante avance na configuración das plataformas de contratación.

En primeiro lugar destaca que todos os perfís do contratante deben, obrigatoriamente, estar aloxados nunha plataforma de contratación, ben estatal ou autonómica que, en cumprimento da Disposición adicional terceira da Lei 20/2013, de 9 de decembro, de unidade de mercado deben estar interconectadas (art. 347 da LCSP).

En segundo lugar, esta lei crea dúas novas modalidades do procedemento aberto chamadas, polos seus importes, a ser as substitutas naturais de parte dos antigos contratos menores e dos desaparecidos procedementos negociados por razón da contía: os denominados procedemento aberto simplificado (PAS) e o procedemento aberto supersimplificado (PASS). Pois ben, unha das singularidades procedimentais máis significativas destas novas figuras é que os anuncios dos contratos tramitados conforme a elas serán unicamente anunciados nos perfís do contratante (e conseguintemente nas plataformas nas que se aloxan) o que amplía substancialmente o número de licitacións publicadas respecto á normativa anterior.

En terceiro lugar destaca o ánimo de evitar que se eluda esa obrigada publicidade ao indicar que serán considerados nulos de pleno dereito os contratos que non publiquen o seu anuncio de licitación no perfil do contratante aloxado nunha das dúas plataformas ou no DOUE (art.39.2. c) LCSP.

Na Comunidade Autónoma de Galicia, a plataforma que aloxa Contratos Públicos de Galicia (en adiante CPG) asumiu no 2008 o reto de integrar toda a contratación pública dos perfís da Administración autonómica e do seu sector público. Pero xa no ano 2010 regulouse coa vocación de ser o punto de acceso a información publicada por todos os perfís dos órganos de contratación do sector público galego, incluídas as entidades locais e órganos estatutarios.

Actualmente gran parte da nosa Administración local, universidades públicas e entidades como o Consello de Contas e o Parlamento de Galicia, publican en CPG converténdose nunha das páxinas máis visitadas no ámbito dos servizos públicos galegos, e tamén das mellor valoradas pola súa claridade e contidos.

Ademais, en cumprimento da antedita Disposición adicional terceira da Lei 20/2013, de 9 de decembro, de unidade de mercado, CPG atópase interconectada coa Plataforma de Contratación do Sector Publico (PLACSP) de xeito que as licitacións anunciadas nela pódense visibilizar a nivel estatal facilitando a concorrencia e acceso ás licitacións das pequenas e medianas empresas.

Este portal resulta de especial interese a todo o tecido empresarial galego e a todos os entes, organismos, entidades, Concellos, Universidades públicas e, en xeral, aos sectores económicos e profesionais participantes nos procesos da contratación pública.

Adaptada a estes cambios normativos, desde CPG poderá acceder á consulta de anuncios de información previa, as licitacións en curso, as adxudicacións, a documentación de interese para a licitación (pregos, datas de apertura, actas, informes técnicos, composicións das mesas, plans anuais de contratación, etc) e aos puntos de contacto e formas de comunicarse cos distintos órganos de contratación que teñen aquí aloxados os seus perfís.

Tamén disporá dun sistema de alertas polo que poderá recibir gratuitamente, no seu enderezo de correo electrónico, avisos sobre os procedementos do seu interese que se publican diariamente na plataforma.

Ademais, desde Contratos Públicos de Galicia, pode acceder a un manual de licitacións que lle pode facilitar un primeiro contacto no aceso ás licitacións do seu entorno e outra información de interese vinculada á contratación pública.

Pode enviar as súas consultas e suxestións a: plataformadecontratacion@xunta.gal